أنطوان القزي ـ بقلبِك يا امّي.بقلم

مجلة عرب أستراليا- سيدني

بقلبِك يا امّي

يا صوت شقّ الريح ومْجالو المدى
غيرِك عذابَ الليلْ ما بيعرفْ حدا
لمّا الشتي بكانون عن دمعِكْ سألْ
بقلبكْ يا أمَي الكونْ عالحب اهتدى
ولمّا مسا الآهات بالصبح انوصلْ
منديل كفّك صار فستان الندى
الله خيوط الشمس برموشك غزل
لمّا صباح الخير بجفونك بدا

وصار الفضا جناحَين وسريري جَبلْ
لما عَباب الضو عصفورِك شدا
أوعى وعاجنح الغيم إرسملِكْ قُبل
وأحفر بصوتك نور عدروب الصدى
وأجدلْ بإيد الريح من شَعرك خصَل
وعينِك زرار النوم تفتحْ عالهدا
وإسمع صلا من شفافْ ما فيها مللْ
عاسرير أحلامي يجيبا وياخدا

إسمِك حلا الأعمار بكتابي اكتمل
يمّي وحنانِكْ صارْ عنوان الفدا
عندي الوفا بينام عا خد الأزل
وحدّي صلاة الإم باقي معبدا
ومهما الكورونا الناس بالدنيي عَزَل
بْعيدِك فَرَحْ لبيوت فستانو ارتدى

رابط مختصر:https://arabsaustralia.com/?p=8779