جورج الخوري – ولادة وفرح ….

مجلة عرب أستراليا سيدني- ولادة وفرح… بقلم الكاتب جورج الخوري

نتفة فرح عالصبح لاقوني
من هالسما نزلوا على عيوني
دمعة فرح من روح مشتاقة عشق
من دكرجات الندى ..
من حبتين الصدى
من كركرة اطيار
حاكوهن وحاكوني
معهن أنا والصبح بي مشوار
ونغمات هالأطيار
والحياة تصيح.. دفّوني
متل ناس صغار
ضحكتن لا بتكذُب ولا بتحتار
شفت الدني بتغار
وبتحتاج المعوني
صغار بس شطّار
عملوا الصبح للصلا أيقوني
عملوا الفرح ولقيت
اكبر بيت للموني
جايين بايدن زيت
عملوا ضو بعيوني
جايين نصبوا خيم
تحت الشمس
تحت الفي حطوني
شوية نغش
وصغار هالايدين يا عيوني
جايي وجايب بقجتو
وضحكة ما لبقت عا حدا
وبالكركرة نهاري ابتدى
ناغيت صوتو ما قدرت
هوي الأصيل والمبتدى
وأنا المقلد ما عرفت
اعمل صدى
صارت عيوني بي ظلالو فيّ
وشد عا ايديّ
مستعجل يشوف الدني
بالولدني خليك
عمر الفرح انتا مجسّد فيك
غنت ضفاف النهر
دقايق بطولة شهر
وطفطف عا كمّو الزهر
صار الصبح حبات
يكرج ندى وضحكات
تلّوا الأرض بالحب ..
تلّوني
أي يا حبيبي الكون
لمّا جيت غيّر لون
روحي معك مش هون
حدك صرت ناغيك
تضحك واكبر فيك
ومن عندك النسمات
روح جديد يعطوني
وجهك صبح نوار
وعيونك شبابيك
صوب الفرح والنور شدّوني

رابط مختصر..https://arabsaustralia.com/?p=21252