مجلة عرب أستراليا سيدني- عمر المرا
بقلم الأديب والشاعر جورج الخوري
تلفتت عا جنبي الحكي بيطول
وسألتى حالي ان كان نسياني
وسالتها هيفا جلاها الطول
ويا غزالة عشق خلقاني
قالت سقالله عا ربيع قبول
وعا حب روّح والعمر فاني
فجأة انتفضت وقلت مش مقبول
وبالاذن منك انتِ غلطاني
عمر المرا متل الطبيعة فصول
كل فصل اجمل من الثاني
…
حلوي المرا زهرة بشهر ايار
وجانح فراشة تبوس الازهار
ويطل وجه الصبح عالمعبور
يقلا صباح الخير للاطيار
وحلوة تمري بحلم ليلة صيف
واحساس موجة بتعشق النسمي
وحلويالشمس مشمش تحمّص ضيف
ويقعدوا الحلوين عالقسمي
وحلوة المرا بايلول سمرا تكون
وهج الجمر برمادها مسكون
وحلوة ان صارت مرمدة اسرار
وجرة خمر مستنظرا كانون
وحلوة المرا بي بردة الكانون
ست الدفا قلبا بيشعل نار
يا جمر حبي احمر ومزيون
عجّل شتاك وبشّر باذار
….
يا فصول عمرا ويا عصير التوت
من ورد جوري هالحلا اجمل
كوني مرا مهما السنين تفوت
هم الكبر ما عمرها بتعتل
بتعرف بانو الحلم ما بيموت
والحب مثل النار ما بيعقل
العطر ما بتشيخ بين بيوت
هوي العاملها ابد اجمل
والشمس لو عملوا لها تابوت
بتطلع بكل نهار ما بتدبل
والمرا الكلا حلا وحسن نعوت
زايد حلاها بس تتكحّل
…..
من هيك لا تخافي خريف العمر
يا هالمرا المتحصنة بتذكار
وكوني اكيدي السحر متل الجمر
ما بينطفي الا ان طفيتي النار
الحب نارو من لهيب وصبر
حتى ان نشرتي الحلم بالمنشار
الحب جايي متل فعل الامر
والعابد المأمور ما بيحتار
….
لما عا غضنك اربعين يغط
ممنوع منّك يسرق الضحكي
صلّي لطير العمر فيها يحط
عيونك الق من سرها بتحكي
ضللي اضحكي سيري عا رمل الشط
موجة مع السمكات والشبكي
والبحر يسرق والشراع ينط
غيران من فستان بالدبكي
ويا عودة الايام لفرخ البط
ويا رجعة الفرحة على المبكي
رابط مختصر-https://arabsaustralia.com/?p=25386